為慶祝「英皇娛樂25+ HAPPY BIRTHDAY慶典」，一眾英皇歌手輪流出動造勢，今次聯乘「BEAT FRIDAY」舉行《英皇盛世之夜 Canton Disco Vibes》，以英皇經典金曲到新派作品串連整個晚上，一首接一首，將現場氣氛由頭帶到落尾，熱鬧非凡。
昨晚（27日），周國賢（Endy）、曾傲棐（Arvin）、女團VIVA、黃明德（Dark）及黎展峯（Andy）齊齊現身派對，何佩瑜（Jeana）更驚喜客串擔任客席DJ打碟，溫碧霞（Irene）及楊天宇（Angus）亦有到場感受熾熱氛圍。全晚歌單充滿集體回憶，由《活著VIVA》、《隆重登場》、《明愛暗戀補習社》、《爆了》、《櫻花樹下》、《彌敦道》，到新派的《FOMO》、《FM520》、《免費升級》、《框框》，每一首都吸引不同年代的樂迷跟着大合唱，場面震撼。
經過一輪熱身後，Arvin、Andy、Dark及VIVA先後上台跟樂迷一齊跳唱，將現場氣氛逐步推高。壓軸登場的周國賢，音樂一響起，全場隨即陷入瘋狂尖叫，將整晚氣氛推向最高峰。原來Endy、Arvin、VIVA、Andy同Dark全部都係第一次參加Canton Pop Party，難怪個個都玩得特別投入。Endy更投入到即場脫掉外套，他興奮表示：「成晚都係自己公司嘅歌，感覺好得意，由舊歌到新歌，成個flow好順，見到台下啲人由頭唱到尾，自己都忍唔住跟住跳，同埋跳到除埋件外套，真係玩得好開心。」
VIVA全晚玩得極度興奮，成員們異口同聲表示：「原來係咁好玩，全部都係我哋自己公司嘅歌，好神奇。公司好多歌都係九十、二十年代嘅經典金曲，中間啲轉換超正，轉得好順。」成員Ada更分享了一段小插曲：「啱啲同啲DJ們指教咗一下，佢哋話播到第一個Chorus嘅時候就可以㩒細聲啲個音樂俾觀眾唱，點知我個Timing一㩒嘅時候就靜咗，哈哈，跟住DJ安慰我：『唔係你問題，係佢哋唔Get啫嗰下。』原來咁樣tune音樂係可以咁樣玩，要捉觀眾嘅Timing，玩吓Party嘅vibe，今晚係好enjoy。」
曾傲棐（Arvin）坦言感覺新鮮：「好似去咗食Omakase咁，同埋公司真係有好多好歌，又可以重溫經典，又可以同一班歌迷近距離接觸一齊玩，good㗎。」黎展峯（Andy）則大讚全晚氣氛：「今晚好正，尤其是係全晚都係我哋英皇嘅歌，同埋都係大家耳熟能詳嘅歌，佢最正嘅就係播小小前奏出嚟，大家就會跟住一齊唱，我覺得呢種感覺好有feel。」黃明德（Dark）亦笑言：「可以同我最愛嘅artist朋友、同事一齊跳舞，聽英皇嘅歌，但係又有少少Remix，今日真係好開心。」
